Khutbah Jumat Bahasa Jawa: Kautaman Lailatul Qadar

اَلْحَمْدُ للهِ. اَلْحَمْدُ للهِ الَّذِيْ خَلَقَ الْاِنْسَانَ فِيْ أَحْسَنِ تَقْوِيْمٍ. أَشْهَدُ اَنْ لَا اِلٰهَ اِلَّا اللهُ الْعَظِيْمِ الْكَرِيْمِ. وَأَشْهَدُ اَنَّ سَيِّدَنَا وَحَبِيْبَنَا مُحَمَّدًا عَبْدُهُ وَرَسُوْلُهُ الَّذِيْ كُنِّيَ بِأَبِي الْقَاسِمِ. اَللّٰهُمَّ صَلِّ وَسَلِّمْ وَبَارِكْ عَلٰى سَيِّدِنَا مُحَمَّدٍ وَعَلٰى اٰلِهِ وَاَصْحَابِهِ اَجْمَعِيْنَ. اَمَّا بَعْدُ فَيَاأَيُّهَا الْحَاضِرُوْنَ. أُوْصِيْكُمْ وَإِيَّايَ بِتَقْوَى اللهِ فَقَدْ فَازَ الْمُتَّقُوْنَ.  اِتَّقُوا اللهَ حَقَّ تُقَاتِهِ وَلَا تَمُوْتُنَّ اِلَّا وَأَنْتُمْ مُسْلِمُوْنَ. يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ

Monggo kito samiyo tansah netepi takwa dateng Allah, kanti nindakaken sedoyo perintahipun, soho nebihi sedaya awisanipun. Tansah netepono takwa lan taat dateng Allah, supados kito pikantuk rahmat lan kanugerahan, ing donyo puniko ngantos mbenjang dumugi akhirat, Amin.  

Poro sederek Muslimin ingkang minulyo

Wonten ing sepalih akhiripun wulan Ramadhan estunipun Allah maringaken rahmat kanugerahan ingkang linangkung agung tumrap kito poro kawulanipun ingkang sami njungkung ibadah. Amergi kamulianipun wulan Ramadhan ingkang kadunungan lailatul qadar, ingkang mulianipun nglangkungi 1000 wulan. Kados dawuhipun Allah:

 لَيْلَةُ الْقَدْرِ ەۙ خَيْرٌ مِّنْ اَلْفِ شَهْرٍۗ 

“Lailatul qadar iku luwih becik katimbang 1000 wulan.” (QS Al Qadar: 3) 

Kanjeng Nabi naliko sampun dumugi akhiripun Ramadhan, cancut taliwondo  gumbregah dalu adang-adang lailatul qadar, kanti njungkung ibadah, lan nggugahi sedoyo keluargo supados sami tumandang ibadah. Kados hadits  ingkang dipun riwayataken Siti A’isyah ra ingkang artosipun kirang langkung: 

“Kanjeng Nabi Muhammad sallallahu ‘alaihi wa sallam puniko naliko sampun manjing sedoso dinten ingkang akhir saking wulan Ramadhan, Panjenenganipun  nggegesang dalu, lan nggugahi sedoyo keluarganipun lan ugi nyancutaken nyamping/agemanipun.” (HR Bukhari dan Muslim)

Poro sederek Muslimin ingkang minulyo

Siti Aisyah nate matur nyuwun pirsa dateng Kanjeng Nabi kanti aturipun mekaten: 

“Duh Rasulullah, sak umpami kulo manggihi lailatul ladar, doa punopo ingkang kedah kawula waos? Lajeng Rasulullah paring dawuh: Sliramu mocoho Allahumma innaka ‘afuwwun karim tuhibbul afwa fa’fu ‘anni (Duh Gusti Allah sak estu Paduka Dzat ingkang Maha Paring pangapunten tur Maha Loman, Paduka tresno dateng pangapunten, mugi ngapunteno dateng kawula).” 

Imam Ar Razi ing Kitab Tafsir Al Kabir ngendiko, nyeriyosaken pengundangipun Malaikat Jibril: 

’’Bilih yektosipun ing lailatul qadar punika Gusti Allah mirsani dateng sedoyo Muslimin, kanti paring rahmat soho ampunan dateng doso lepatipun Muslimin, kejawi sekawan golongan. Inggih puniko wong kang nduwe kesenengan ngombe arak utowo minuman kang mendemi, wong kang wani marang wong tuoa lorone, wong kang medot taline paseduluran, lan wong kang ngenengke sedulur Islam, ora gelem ngajak utawa diajak guneman luwih telung ndina.’’ 

Mugi-mugi kito kalebetno kawulo ingkang pikantuk rahmat lan maghfirah ing lailatul qadar, pinaringan istikamah ngantos paripurnanipun Ramadhan. Sedoyo ibadah kito katampi makbul ing ngarsanipun Allah subhanahu wa ta’ala.