Khutbah Jumat Bahasa Jawa: Sugeng Rawuh Ramadhan

اْلحَمْدُ للهِ اْلحَمْدُ للهِ الّذي هَدَانَا سُبُلَ السّلاَمِ، وَأَفْهَمَنَا بِشَرِيْعَةِ النَّبِيّ الكَريمِ، أَشْهَدُ أَنْ لَا اِلَهَ إِلَّا الله وَحْدَهُ لا شَرِيك لَه، ذُو اْلجَلالِ وَالإكْرام، وَأَشْهَدُ أَنّ سَيِّدَنَا وَنَبِيَّنَا مُحَمَّدًا عَبْدُهُ وَ رَسولُه، اللّهُمَّ صَلِّ و سَلِّمْ وَبارِكْ عَلَى سَيِّدِنا مُحَمّدٍ وَعَلَى الِه وَأصْحابِهِ وَالتَّابِعينَ بِإحْسانِ إلَى يَوْمِ الدِّين، أَمَّا بَعْدُ: فَيَايُّهَا الإِخْوَان، أوْصُيْكُمْ وَ نَفْسِيْ بِتَقْوَى اللهِ وَطَاعَتِهِ لَعَلَّكُمْ تُفْلِحُوْنْ، قَالَ اللهُ تَعَالىَ فِي اْلقُرْانِ اْلكَرِيمْ: أَعُوْذُ بِاللهِ مِنَ الَّشيْطَانِ الرَّجِيْم، بِسْمِ اللهِ الرَّحْمَنِ الرَّحِيْمْ: يَا أَيُّهَا الَّذِينَ آَمَنُوا اتَّقُوا الله وَقُولُوا قَوْلًا سَدِيدًا، يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْ وَمَنْ يُطِعِ الله وَرَسُولَهُ فَقَدْ فَازَ فَوْزًا عَظِيمًا وقال تعالى يَا اَيُّهَا الَّذِيْنَ آمَنُوْا اتَّقُوْا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنْتُمْ مُسْلِمُوْنَ. صَدَقَ اللهُ العَظِيمْ

Monggo sami kito nambahi takwa lan ajrih kito dumateng Allah, kanti nindakaken dawuh-dawuhipun, lan nebihi sedoyo awisanipun. Mugi-mugi kita tansah kaparingan rahmat kawilujengan saking ngarso Dalem Allah ta’ala, amin.

Gilir gumantosing mongso tansah lumampah mboten wonten kendelipun, kito mboten kraos sampun bade lumebet ing wulan suci Ramadhan. Pramilo monggo kito nglahiraken raos syukur lan remen saget pinanggih malih kaliyan wulan suci  Ramadhan. Kanti raos remen kemawon kadumugen wulan Ramadhan sampun ageng kautamenipun. 

Kanjeng Nabi sampun paring dawuh ingkang artosipun kirang langkung mekaten: “Sopo wonge bungah sebab tumekane sasi Ramadhan, Allah nglarang jasade wong mau mlebu neroko.”

Naliko sampun dumugi akhir ipun wulan Sya’ban ngaten puniko, kolo semanten Kanjeng Nabi dawuh wonten ing khutbahipun, ingkang artosipun kirang langkung mekaten:

“He eling-eling poro manungso, temenan bakal tumeko sawijining wulan kang agung, kang dibarokahi, kang mayungi marang sira kabeh. Yaiku sasi Ramadhan, ing wulan Ramadhan kuwi ana sawijining wengi kan diarani Lailatul Qadar, kang kautamane ngungkuli sewu wulan. Allah wis amajibake pasa ing sasi kuwi, lan disunatake shalat wengi ing sasi kuwi, sing sopo wonge ngibadah taqarrub marang Allah, ono ing sak jerone wulan mau, kelawan amal kabecikan mongko koyo-koyo nindakake ibadah fardlu ing sak jerone sasi liyane.  Lan sing sopo wonge ngibadah fardlu siji ing wulan Ramadhan, mongko koyo ngibadah pitung puluh fardlu ing sasi liyane. Lan sasi Ramadhan iku sasi sabar, dene sabar iku ganjarane suwargo, Ramadhan iku sasi kanggo asih-asihan, lan sasi iki mangsane ditambahi peparing rezeki.” (HR Ibnu Khuzaimah lan Al Baihaqi)

Dene menopo sebabipun Allah maringaken rahmat ingkang semanten katahipun, jalaran Allah nurunaken Al-Qur’an wonten ing sak lebetipun wulan Ramadhan, kados dawuh:

“Sasi Ramadhan iku, sasi kang den turunake Qur’an ing sak jerone sasi kuwi, minangka pituduhe para manungso, lan kang mertelakake sangka dalaning pituduh, lan kang ambedakake antarane perkara kang hak lan bathil….” (QS al-Baqarah: 185)

Mugi-mugi Allah maringi kanugerahan tetep iman Islam, yuswa panjang lan kesehatan, sahinggo kito nindakaken jejibahan siyam lan ibadah Ramadhan kanti enteng lan wusono katampi wonten ing ngarsanipun Allah ta’ala.