Khutbah Jumat Bahasa Jawa: Amaliah Dinten Arafah

الْحَمْدُ لِلّٰهِ الَّذِيْ هَدَانَا سُبُلَ السّلَامِ، وَأَفْهَمَنَا بِشَرِيْعَةِ النَّبِيّ الْكَريمِ  أَشْهَدُ أَنْ لَا اِلٰهَ إِلَّا الله وَحْدَهُ لَا شَرِيْكَ لَهُ، ذُو الْجَلَالِ وَالْإكْرَامِ، وَأَشْهَدُ أَنَّ سَيِّدَنَا وَنَبِيَّنَا مُحَمَّدًا عَبْدُهُ وَ رَسُوْلُهُ  اللّٰهُمَّ صَلِّ وَسَلِّمْ وَبارِكْ عَلَى سَيِّدِنَا مُحَمّدٍ وَعَلَى اٰلِه وَأَصْحَابِهِ وَالتَّابِعينَ بِإحْسَانٍ إلَى يَوْمِ الدِّيْنِ  أَمّا بَعْدُ  اُوْصِيْنِى وَاِيَّايَ بِتَقْوَى اللَّهِ وَطَاعَتِهِ لَعَلَّكُمْ تُفْلِحُوْنَ. يَاأَيّهَا الّذَيْنَ آمَنُوْا اتّقُوا اللهَ حَقّ تُقَاتِهِ وَلاَ تَمُوْتُنّ إِلاّ وَأَنْتُمْ مُسْلِمُوْنَ

Monggo kito samiyo tansah netepi takwa dateng Allah, kanti takwa ingkang sakestu sarono tansah nindakaken sedaya perintah lan dawuh-dawuhipun, soho nilar sedaya awisanipun. Kanti tansah netepi takwa lan taat dateng Allah, ing pangajab kito tansah pikantuk kanugrahan, saking ngarsanipun Allah ta’ala. Amin. 

Sikap mental ingkang mekaten kedah kados kepribadian tumrap tiyang Mukmin. Kanjeng Nabi Muhammad sallallahu ‘alaihi wa sallam dawuh ingkang artosipun kirang langkung mekaten: 

“Wedio siro ing Gusti Allah, ing endi nggon ano siro, tut burenono kaelekan iku kelawan kebecikan, jalaran kebecikan iku bisa nglebur kaelekan, lan gaweo budi  pekerti siro kelawan budi pakerti kang becik.” (HR At Turmudzi) 

Poro sederek Muslimin ingkang minulyo

Wekdal meniko kito sampun mlebet ing wulan minulyo jalaran kadunungan dinten-dinten ingkang mulyo, inggih dinten Arafah lan dinten Nahar. Katah amal ingkang saget kito tindakaken ing dinten lan wulan ingkang mulyo puniko. Kanti ngatahaken ibadah, maos-maos kalimahipun Allah,  soho nindakaken siyam sunnah, kados dawuh dalem kanjeng Nabi ingkang artosipn kirang langkung mekaten: 

“Mulo podo ngakeh-akehno siro kabeh ing dino kuwi kanti moco tahlil, takbir, lan dzikir marang Allah, dene poso sedino ing dino kuwi bisa mbanding poso setahun,  lan ngamal bagus ing dino kuwi ditikelake ganjarane kelawan 700 tikelan.” (HR Al Baihaqi) 

Semanten agunging kautamen nindakaken ibadah ing dinten kasebat. Linangkung siyam dinten Arofah saget kagem nebusi kalepatan kalih tahun, junjungan kito Kanjeng Nabi Muhammad saw.  Nate dipun suwuni pirso saking mulyane dinten Arafah, lajeng panjenenganipun paring dawuh: 

“Pasa dina Arafah iku aku neqadake yen Allah bakal nebusi dosa setahun sak bakdane lan setahun sak durunge.” (HR At Turmudzi)

Dawuh Nabi kasebat miderek ngendikane sahabat Ibnu Abbas ngisyarataken bilih tiyang ingkang nindakaken siyam Arafah insyaAllah tasih bade menangi setahun ingkang bade dumugi, jalaran sampun cinawisan tebusaning kalepatan saking  ngarsonipun Allah. 

Tentu sewalikipun tiyang ingkang mboten purun siyam dinten Arafah, inggih mboten wonten jaminan umuripun dumugi setahun ingkang bade dateng. 

Poro sederek Muslimin ingkang minulyo

Pramilo rahmati pun Allah ingkang kaparingan ing dinten mulyo puniko ampun ngantos kito sia-siaaken supados kito mboten nandang kapitunan. Semanten agunging kautaman nindakaken ibadah ing dinten kasebat. Jalaran ing dinten Arafah puniko wancinipun poro jamaah haji sedoyo kempal wonten ing oro-oro Arafah nindakaken wukuf minongko puncakipun ibadah haji. 

Milo kito samiyo saget ngimbangi dateng sederek kito, sinten mangertos tahun ngajeng kito saget katimbalan wukuf ing oro oro Arafah. Mugi-mugi Allah nggampilaken sarono dumugi mriko. Wusononipun mugi kito kaparingan  pitulung saget nindakaken amaliah kangge mulyaaken lan ngegungaken dinten mulyo puniko kanti ridlanipun Allah ta’ala, wekasan manggih kabegjan gesang kito donya dumugining akhirat.