Khutbah Jumat Bahasa Jawa: Niyat Minongko Ruhe Ibadah

اْلحَمْدُ للهِ اْلحَمْدُ للهِ الّذي هَدَانَا سُبُلَ السّلاَمِ، وَأَفْهَمَنَا بِشَرِيْعَةِ النَّبِيّ الكَريمِ، أَشْهَدُ أَنْ لَا اِلَهَ إِلَّا الله وَحْدَه لا شَرِيك لَه، ذُو اْلجَلالِ وَالإكْرام، وَأَشْهَدُ أَنّ سَيِّدَنَا وَنَبِيَّنَا مُحَمَّدًا عَبْدُهُ وَ رَسولُه، اللّهُمَّ صَلِّ و سَلِّمْ وَبارِكْ عَلَى سَيِّدِنا مُحَمّدٍ وَعَلى الِه وَأصْحابِه وَالتَّابِعينَ بِإحْسانِ إلى يَوْمِ الدِّين، أَمَّا بَعْدُ: فَيَايُّهَا الإِخْوَان، أوْصيْكُمْ وَ نَفْسِيْ بِتَقْوَى اللهِ وَطَاعَتِهِ لَعَلَّكُمْ تُفْلِحُوْنْ، قَالَ اللهُ تَعَالى فِي اْلقُرْانِ اْلكَرِيمْ: أَعُوْذُ بِاللهِ مِنَ الَّشيْطَانِ الرَّجِيْم، بِسْمِ اللهِ الرَّحْمَنِ الرَّحِيْمْ: يَا أَيُّهَا الَّذِينَ آَمَنُوا اتَّقُوا اللهَ وَقُولُوا قَوْلًا سَدِيدًا، يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْ وَمَنْ يُطِعِ اللهَ وَرَسُولَهُ فَقَدْ فَازَ فَوْزًا عَظِيمًا وقال تعالى يَا اَيُّهَا الَّذِيْنَ آمَنُوْا اتَّقُوْا اللهَ حَقَّ تُقَاتِه وَلاَ تَمُوْتُنَّ إِلاَّ وَأَنْتُمْ مُسْلِمُوْنَ. صَدَقَ اللهُ العَظِيمْ

Monggo kita sedoyo samiyo tansah netepi takwa dumateng Allah wonten ing sadengah kawontenan. Ampun ngantos pejah kejawi minangka Muslim. Jalaran inggih namung kanti takwa, kito sedoyo badhe nggayuh kabegjan wiwit donya puniko ngantos mbenjang wonten ing akhirat.  

Sak lajengipun kito sampun sami ngawuningani bilih kewajiban tumrap kito gesang ing ngalam projo puniko mboten wonten sanes kejawi ngumawulo dateng Allah ta’ala, kanti toto coro ingkang sampun katentokaken dening Allah lumantar tuntunanipun Nabi lan Rasul utusanipun Allah. Inggih kanti netepi syariat agami Islam. Mboten cekap kanti miturut pengangen-angenipun piyambak. Ananging  kedah miderek tuntunanipun poro utusanipun.  

Allah dawuh wonten Al-Qur’an: 

 

 

  “…Opo kang diasto dening Rasul marang siro kabeh, mongko podo ndereko, lan opo kang dilarang tumrap siro kabeh podo tinggalno….” (QS Al Hasyr: 7) 

Poro sederek Muslimin ingkang minulyo

Wondene pendamel saget dumunung ibadah menggahipun Allah puniko ugi sanget gumantung dateng sejo lan niyatipun. Niyat tumrapipun ibadah puniko minongko ruh ingkang bade nentokaken ibadah wau. Satunggaling pendamelan bade  dumunung ibadah menawi kaniyatan ibadah dateng Allah. Dawuhe Kanjeng Nabi ingkang kirang langkung artosipun mekaten: 

”Saktemene amal manungso iku gumantung soko niyate…’’ 

Dawuhipun Nabi puniko estunipun panjang, ingkang nyariosaken tindakipun poro sahabat kolo semanten naliko nderek hijrahipun Kanjeng Nabi. Miturut lahiripun hadits, poro sahabat nderek hijrah niyatipun warni-warni, wonten ingkang  pancen hijrah nderek dateng Allah lan Rasulipun, wonten ingkang kerana tiyang estri ingkang kepengin dipun nikahi, lan sanes sanesipun. 

Dados pendamelipun setunggal hijrah nderek jengkaripun Kanjeng Nabi, nilar nagari Makkah tumuju dateng tanah Madinah, nanging niyatipun para shahabat  kasunyatan macem-macem kados kasebat ngajeng. Kesimpulanipun,''...saktemene saben wong bakal diwales manut apa kang diniyati..''

Perkawis ingkang lahiripun amal donyo kemawon, sauger mboten dipun awisi dening Allah, menawi dipun niyati sae bade tampi ganjaran saking ngarsanipun Allah, menopo malih ingkang pancen kawontenanipun arupi amal akhirat, ampun  ngantos dipun slewengaken kanti niyat ingkang mboten sae, mindak kito kecelik mboten tampi piwales kanugrahan ganjaran saking ngarsa Allah ta’ala.  

Mugi-mugi tumindak kito saget dumunung ibadah menggahipun Allah, sahinggo gesang kito puniko saget jumbuh kados dawuhipun Allah: 
 

وَمَا خَلَقْتُ الْجِنَّ وَالْاِنْسَ اِلَّا لِيَعْبُدُوْنِ

“Lan ingsun Allah ora anitahake jin lan manungso kejobo supoyo podo ngibadah ngumawula marang ngarso Ingsun.”(QS Adz Dzariyat: 56) 

Wusananipun mugi Allah tansah maringi pitedah lan pitulungipun dateng kito, tansah nindakaken dawuhipun lan nilar awisanipun, wusana pinaringan wilujeng donyo akhirat. Amin.