Khutbah Jumat Bahasa Jawa: Wong Tuwo Kudu Prayitno

الْحَمْدُ لِلّهِ رَبِّ الْعَالَمِيْنَ، وَبِه نَسْتَعِيْنُ عَلى أُمُوْرِ الدُّنْيَا وَالدِّيْنِ، وَالصَّلَاةُ وَالسَّلَامُ عَلى أَشْرَفِ اْلأَنْبِيَاءِ وَالْمُرْسَلِيْنَ، نَبِيِّنَا مُحَمَّدٍ صَلَّى اللهُ عَلَيْهِ وَسَلَّمَ وَعَلى اٰلِه وَأَصْحَابِه وَالتَّابِعِيْنَ وَمَنْ تَبِعَهُمْ بِإِحْسَانٍ إِلى يَوْمِ الدِّيْنِ، أَشْهَدُ أَنْ لَا إِلٰهَ إِلَّا الله وَحْدَه لَاشَرِيْكَ لَهُ الْمَلِكُ الْحَقُّ اْلمُبِيْن. وَأَشْهَدُ أَنَّ سَيِّدَنَا مُحَـمَّدًا عَبْدُه وَرَسُوْلُهُ صادِقُ الْوَعْدِ اْلأَمِيْن اَللَّهُمَّ صَلِّ وَسَلِّمْ وَبَارِكْ عَلى سَيِّدِنَا مُحَمَّدٍ وَعَلى آلِه وَصَحْبِه أَجْمَعِيْنَ أَمَّا بَعْدُ فَيَا أَيُّهَا الْحَاضِرُوْنَ. اِتَّقُوا اللهَ حَقَّ تُقَاتِهِ وَلَا تَمُوْتُنَّ إِلَّا وَأَنْتُمْ مُسْلِمُوْنَ. فَقَالَ اللهُ تَعَالَى: وَاعْبُدُوا اللّٰهَ وَلَا تُشْرِكُوْا بِهٖ شَيْـًٔا وَّبِالْوَالِدَيْنِ اِحْسَانًا وَّبِذِى الْقُرْبٰى وَالْيَتٰمٰى وَالْمَسٰكِيْنِ وَالْجَارِ ذِى الْقُرْبٰى وَالْجَارِ الْجُنُبِ وَالصَّاحِبِ بِالْجَنْۢبِ وَابْنِ السَّبِيْلِۙ وَمَا مَلَكَتْ اَيْمَانُكُمْۗ اِنَّ اللّٰهَ لَا يُحِبُّ مَنْ كَانَ مُخْتَالًا فَخُوْرًاۙ 

Poro sederek Muslimin ingkang minulyo

Sesarengan monggo tansah kito tingkataken iman lan takwa kito dumateng Allah subhanahu wa ta’ala, injih kanti nindakaken dawuh-dawuhipun lan nebihi awisan-awisanipun, kanti mekaten mugi mugi kito kalebet golonganipun tiyang ingkang bejo  donya lan akhiratipun Amin. 

 

Saklajengipun, monggo kito sami renungaken pangandikanipun Allah wonten ing Al Qur’an Surat Ibrahim ayat 40, ingkang nyariosaken Nabi Ibrahim naliko ndongo nyuwun dateng Allah ta’ala : 

 

 

“Duh Pangeran kulo, mugi ndadosakno Tuan dumateng kulo lan anak anak turun kulo kalebet golonganipun tiyang-tiyang ingkang njumenengi shalat, Duh  Pangeran kito, mugi Tuan nyembadani panyuwun kito.” (QS Ibrahim: 40) 

 

Ayat puniko paring suraos dumateng kito poro tiyang sepuh, supados kito sedoyo berusaha kanti sak estu migatosaken lan ndidik dateng anak-anak kito, supados dados lare lan pribadi ingkang sae. Kanti coro ngarahaken lan nggretehi supados putro-putro kito purun kulino nindakaken shalat kanti sae, sebab shalat puniko ingkang samangke bade mbedakaken antawisipun tiyang ingkang Muslim lan sanesipun. 

Mawerni-werni kemaksiatan lan penyakit masyarakat ingkang sakmeniko katah kito  panggihaken ing kiwo tengen masyarakat, ingkang estu estu damel risakipun moral lan pribadi sebagian anak-anak kito, insyaallah beboyo puniko saget dipun cegah menawi anak-anak kito kulino lan mbiasakaken nglampahi shalat kanti sae. Jalaran shalat minongko sarono kangge nyegah sedoyo pendamel awon.

Kados dawuh Al-Qur’an: 

 

إِنَّ الصَّلاةَ تَنْهى عَنِ الْفَحْشَاءِ وَالْمُنْكَرِ  

 

“Sak temene shalat iku biso nyegah songko perkoro kang jember lan perkara kang munkar.” (QS Al Ankabut: 45)

Kosok wangsulipun sebagian anak-anak ingkang tansah ugal-ugalan, remen mendem, wegah kangelan, ngantos terlibat pencurian, penipuan, punopo dene kenakalan lan kejahatan sanesipun, menawi kito gatosaken penyebabipun amergi tebih saking kaidah kaidah agami lan mboten nindakaken shalat kanti sae. 

Satunggaling perkawis ingkang mrihatosaken, injih wontenipun kondisi ing daerah kito puniko, sampun mboten sekedik lare lan ugi tiyang sepuh ingkang kirang perhatian lan nggegampang masalah shalat punika. Langkung langkung Shalat  Shubuh. Ndalu ngobrol lan jagongan ngantos kliwat wayah, enjang Shalat Shubuhipun kobongan, malah kadang kadang mboten shalat sisan. 

 

Kawontenan mekaten menawi mboten kito dandosi,mboten mokal menawi samangke dados sebab tumurunipun balak lan belahi saking ngarsanipun  Allah Pangeran kita, minimal icalipun berkahipun gesang wonten ing daerah kito punika, jalaran saking sikap kito ingkang kirang perhatian lan nggegampang dateng masalah shalat.

Pramilo puniko, kagem kito para bapak minangko tiyang sepuh ingkang nyepengi tanggung jawab keluargo, monggo kito tingkataken malih greteh lan perhatian kito anggenipun ngarahaken garwa lan putra, termasuk diri kita piyambak, anggenipun  njagi shalatipun, supados kito selamet saking balak lan bilahi soho musibah awit saking tindakan kito ingkang tledor nggegampang shalat kasebat. 

 

Mugi mugi Allah swt tansah paring pitedah lan pitulung dumateng kito sedoyo, tansah saget ngleksanakaken dawuh-dawuhipun, njagi pribadi lan keluarga kito saking neraka. Amin.