Khutbah Jumat Bahasa Jawa: Mangayubagyo Nisfu Sya’ban

Monggo kito sesarengan nambahi takwa kito dateng Allah, kanti tansah netepi taat dateng sedoyo perintah lan dawuh-dawuhipun, soho nebihi sedoyo awisanipun. Ampun ngantos kuma wantun nilar kewajiban lan nglirwaaken dawuh dawuhipun 

Allah, lan ugi ampun ngantos nerjang palang awisan ipun Allah. Ing pangajab kito tansah pinaringan rahmat lan kanugerahan, saking ngarsa 

Dalem Allah ta’ala. Amin. 

Wonten ing wulan Sya’ban meniko wonten khususiyah, inggih meniko nisfu Sya’ban. Prastowo sejarah ingkang sampun dumados ing saminipun wekdal kasebat, inggih meniko prastowo tahwilul qiblah, pemindahan kiblat. Allah nurunaken wahyu perintah pindah kiblat. Inggih madep dateng arah Masjidilharam, ingkang sekawit dateng arah Masjidilaqsha. Dawuhipun Allah:

’’Temen Ingsun mirsani wajah iro (Muhammad) bolak-balik ndangak ing arah langit, mongko yekti Ingsun arahake temenan siro ing kiblat kang sira senengi, mula adepno wajah iro ing arahe Masjidilharam.” (QS Al Baqarah :144)

Poro sederek Muslimin ingkang minulyo

Katah kautaman lan kamulyanipun nisfu Sya’ban, jalaran Allah paring rahmat lan kanugerahan paring ijabah dateng para kawula ing wekdal kasebat. 

Kados kasebat wonten ing hadits Rasulullah saw paring dawuh ingkang artosipun kirang langkung mekaten:

’’Onoto wong kang nyuwun ngapuro marang Ingsun, mesti Ingsun paringi pangapuro, onoto wong kang nyuwun rizeki, mesti Ingsun paringi rizki, onoto wong kang loro, mesti Ingsun warasake, lan koyo ngono sak banjure, nganti tumeko metune fajar.” (HR. Ibnu Majah)

Pramilo monggo kito gayuh kanugerahan sarono nggegesang dalu nisfu Sya’ban, kanti ibadah, ngatah-ngatahaken dzikir lan dongo, panyuwun rahmat lan maghfirahipun Allah. 

Ampun ngantos nglirwaaken saat ijabah ing malem nisfu Sya’ban, jalaran Allah ngluberaken rahmat sedoyo panyuwunan diijabahi dening Allah. Al-Imam Asy Syafi’i ngendika ing kitab al-Umm, ingkang artosipun mekaten:

Al Imam as-Syafi’i ngendiko: “Wus tumeka ing kito, menowo sak temene kabeh dongo panyuwunan mesti dikabulake ing sak jerone limang wektu bengi, yaiku ;

malem Jumat, malem riyaya Idul Adha, malem riyaya Idul Fitri, kawitane wengi sangka wulan Rajab, lan malem nisfu Sya’ban.” (Al-Imam as-Syafi’i, al-Umm: 1/231)

Mugi mugi Allah maringono pitedah lan pitulung dateng kito sedoyo, saget nindaaken ibadah lan pandongo ing nisfu Sya’ban, wusana Allah paring rahmat lan ijabah. Amin.

بَارَكَ اللّهُ لِىْ وَلَكُمْ فِى الْقُرْآنِ الْعَظِيْمِ. وَنَفَعَنِيْ وَاِيَّكُمْ بِمَا فِيْهِ مِنَ اْلاَيَاتِ وَالذِّكْرِ الْحَكِيْمِ. وَتَقَبَّلَ مِنِّى وَاِيَّاكُمْ تِلاَ وَتَهُ اِنَّه هُوَ السَّمِيْعُ الْعَلِيْمِ.