Khutbah Jumat Bahasa Jawa: Ampun Nglirwaaken Ibadah Fardlu

Sumonggo, kulo dherekaken sesarengan sami nambahi iman lan takwa kito dhumateng Allah swt. Mugi-mugi kanthi takwa puniko gesang kito tansah wilujeng, ayem, tentrem kalis ing rubeda wiwit ing alam donyo puniko ngantos benjang wonten ing akhirat. Amin. 

 

Poro sederek Muslimin rahimakumullah Inggih namung kanti takwa dumateng Allah puniko kito bade kaparingan pitedah saget mbentenaken perkawis ingkang sae lan awon, leres lan lepat, hak lan  batil, halal lan haram mekaten ugi kito bade pikantuk pangapunten kalepatan kito saking ngarsa dalem Allah ta’ala. Kados dawuhipun Allah: 
 

  يٰٓاَيُّهَا الَّذِيْنَ اٰمَنُوْٓا اِنْ تَتَّقُوا اللّٰهَ يَجْعَلْ لَّكُمْ فُرْقَانًا وَّيُكَفِّرْ عَنْكُمْ سَيِّاٰتِكُمْ وَيَغْفِرْ لَكُمْۗ

“Hei wong kang podo iman menowo siro kabeh pada takwa marang Allah, mongko Allah ta’ala bakal maringi furqan tegese pituduh kanggo sira kabeh kang sira kabeh banjur bisa mbedakake antarane perkara kang ala lan becik, bener lan luput, lan Allah bakal nglebur ngamal ala ira kabeh lan uga ngapura dosa dosa ira kabeh." (QS Al Anfal: 29)

Sak estunipun taat dateng Allah kanti nindakaken sedoyo perintahipun  Allah, soho nilar lan nebihi awisanipun Allah puniko kangge kesaenan kito piyambak. Kosok wangsulipun, nerjang awisan lan nerak wewaleripun Allah puniko  dados sumbering karisakan lan kasengsaraning gesang kito, wiwit donyo ngantos dumugining akhirat. 

Allah sampun paring pepenget dateng kito kanti dawuhipun: 
 

“Sopo wonge mengo songko eling Ingsun, mesti bakal nemahi panguripan kang rupek, lan bakan Ingsun giring wong kuwi besuk dina qiyamat kanti kahanan wuta.” (QS Thaha: 124) 

 

Mboten wonten sarono kangge nggayuh kabegjaning gesang puniko kejawi namung taqarrub dateng ngarso dalem Allah ta’ala. Dene margi lan sarana taqarrub  dateng Allah puniko katah sanget coro ingkang saget kito tempuh, ananging ingkang langkung utami lan prayogi kito tindakken tentu kanti nuhoni dateng  kewajiban lan ibadah fardlu langkung rumiyin. Ampun ngantos ingkang fardlu dipun lirwakaken, ingkang dawah sunnah malah dipun tengenaken.  

 

Kados wekdal kapengker Shalat Tarawih sewulan muput dipun ayahi, shalat fardlu gangsal wekdalipun malah alasan prei. Shalat riyoyo nganti dinggo suloyo, nanging  shalat fardlu limang wektu malah ora tahu. Pramilo ibadah sunnah utami dipun tindakaken nanging ibadah fardlu kedah dipun rumiyinaken. Rasulullah sampun  paring dawuh ing hadits Qudsi ingkang artosipun kirang langkung mekaten: 

 

“Ora tumindak ngibadah keparek kawulaningsun marang Ingsun kelawan sawijining penggawe ibadah kang luwih Ingsun tresnani katimbang ngelakoni perkoro kang Ingsun wajibake tumrap deweke.” (HR Al Bukhari)

Ibadah ingkang dipun tindakaken ampun ngantos tumindak ibadah nanging kecampuran niyat lan tujuan sanes, amergi namung bade ngrisakaken dateng ibadah kito. Allah dawuh ing Al-Qur’an: 
 

وَمَآ اُمِرُوْٓا اِلَّا لِيَعْبُدُوا اللّٰهَ مُخْلِصِيْنَ لَهُ الدِّيْنَ ەۙ  

 

“Lan manungso iku ora diperintah kejobo supoyo ngibadah marang Allah kelawan murniake agama kerono Allah.” (QS Al Bayyinah: 5) 
 

Pramilo monggo samu kawis tumindak ibadah kito kaniyatono ingkang ikhlas kangge nggayuh karidlanipun Allah, sahinggo wusananipun cinaket  wonten ngarsanipun Allah. Mugi kito kalebetno kawulo ingkang tansah nuhoni  kewajiban kumawulo dateng Allah kanti istikamah wusananipun pikantuk ridlanipun Allah ta’ala.

الْحَمْدُ لِلّهِ الَّذِي هَدَانَا لِهذَا وَمَا كُنَّا لِنَهْتَدِيَ لَوْلَا أَنْ هَدَانَا اللهُ، أَشْهَدُ أَنْ لاَ إِلهَ إِلاَّاللهُ وَحْدَه لاَ شَرِيْكَ لَهُ وَأَشْهَدُ أَنَّ مُحَمَّداً عَبْدُهُ وَرَسُوْلُهُ. اَللّهُمّ صَلِّ وَسَلِّمْ عَلى سيدنا مُحَمّدٍ وَعَلى آلِه وِأَصْحَابِه وَمَنْ تَبِعَهُمْ بِإِحْسَانٍ إِلى يَوْمِ الدّيْن. اَمَّا بَعْدُ